नेपालमाला
१८ असार २०७८, शुक्रबार 
काठमाडौं : नेकपा एमालेको केन्द्रीय कमिटी बैठक आज बस्दैछ । बैठक बिहान ११ बजेका लागि बोलाइएको छ । झलनाथ खनाल र माधव नेपाल समूहले उक्त बैठक बहिस्कार गर्ने निर्णय गरिसकेको छ । हिजो बुद्धनगरस्थित एक पार्टी प्यालेसमा बसेको स्थायी कमिटी बैठकले आजका लागि बोलाइएको बैठकमा सहभागी नहुने निर्णय गरेको हो ।
अवैधानिक कमिटीले बोलाएको अवैधानिक बैठकमा आफूहरु नजाने र सहमतिको आधारमा २०७५ जेठ २ गतेको कमिटीको बैठक डाक्नुपर्ने माग खनाल–नेपाल समूहको छ ।
बुधवार बालुवाटारमा बसेको दशौं राष्ट्रिय महाधिवेशन कमिटीको बैठकले कमिटीलाई केन्द्रीय कमिटीमा रुपान्तरण गरेको थियो । रुपान्तरित केन्द्रीय कमिटीको बैठक आजका लागि बोलाइएको हो ।
एमालेका अध्यक्ष केपीशर्मा ओली पक्षले भने कमिटी जेठ २ मा फर्किएको दाबी गर्दै आएको छ । खनाल–नेपाल समूहले भने आजको बैठक सारेर सहमतिका आधारमा बैठक बोलाउन प्रस्ताव राखेको छ ।
बिहीबार केपी ओली र खनाल–नोपल पक्षका दोस्रो तहका नेताहरुबीच भएको छलफलमा माधव पक्षका नेताहरूले आजका लागि बोलाइएको केन्द्रीय कमिटी बैठक सार्न प्रस्ताव राखेका थिए । खनाल–नेपाल पक्षले बैठक सार्न र सहमतिका आधारमा बैठक राख्न प्रस्ताव गरेको थियो ।
