नेपालमाला
११ असार २०७८, शनिबार 
काठमाडौँ : खाँडादेवी जेसीजको आयोजनामा लर्निङ थ्री डे कार्यक्रम भर्चुअल माध्यमबाट सम्पन्न भएको छ । सो कार्यक्रममा फरक दिन फरक विषयमा रहेर फरक प्रशिक्षकले प्रशिक्षण दिएका थिए ।
उक्त कार्यक्रममा पहिलो दिन ‘नेतृत्व विकासमा सिर्जनाको भूमिका’ विषयमा नेपाल प्रज्ञा प्रतिष्ठानका प्राज्ञ डा. देवी नेपालले प्रशिक्षण दिएका थिए भने कार्यक्रममा प्रमुख अतिथि नेपाल जेसिजका राष्ट्रिय अध्यक्ष जेसीआई सेनेटर अरुनेश्वर खनाल रहेका थिए ।
त्यसैगरी दोस्रो दिन ‘समावेशी समाज निर्माणमा युवाहरुको भूमिका’ विषयमा नेपाल संगीत तथा नाट्य प्रज्ञाप्रतिष्ठानका प्राज्ञ धिरेन्द्र प्रेमर्षि झाले प्रशिक्षण दिएका थिए । दोस्रो दिनको प्रमुख अतिथि खाँडदेवी गाँउपालिकाका प्रमुख प्रेम तामाङ थिए ।
यस्तै तेस्रो दिन ‘सूचना र सञ्चार क्षेत्रमा युवाहरुको भूमिका’ विषयमा नेपाल टेलिभिजनका महाप्रबन्धक फुलमान बलले प्रशिक्षण दिएका थिए । यस दिनको प्रमुख अतिथि बागमती प्रदेशका आर्थिक मामिला तथा योजनामन्त्री कैलाश ढुंगेल रहेका थिए ।
हरेको ठाउँमा युवाहरुको ठूलो योगदान हुने भएकोले युवालाई अगाडि बढाउन तालिम तथा प्रशिक्षणको आवश्यकता हुन्छ भन्ने हेतुले उत्त कार्यक्रमहरु राख्दै आएको खाँडादेवी जेसीजका अध्यक्ष होमराज श्रेष्ठ बताए ।
युवाहरुलाई अघि बढाउन थालिएको हरेक कदममा खाँडादेवी जेसिजसँग सहकार्य गर्ने मन्त्री ढुंगेलले प्रतिवद्धता जनाए ।
खाँडादेवी गाउँपालिकाका प्रमुख प्रेम तमाङले युवालाई सिर्जनशील र रचनात्मक बनाउन कुनै कसुर नराख्ने बताए । ‘खाँडादेवी जेसिजले धेरै कार्यक्रम तथा तालिम गर्दै आएको छ । आगामी दिनमा कार्यक्रमलाई निरन्तरता देओस् । हरेक राम्रो काममा खाँडादेवी गाउँपालिकाले सहयोग गर्नेछ’, उनले भने ।
राष्ट्रिय अध्यक्ष जेसीआई सेनेटर अरुनेश्वर खनालले प्रस्तावित शाखा भएर पनि खाँडादेवीले धेरै कार्यक्रम गरेकोमा प्रशंसा गरे ।
कार्यक्रममा एरिया ग आसान राष्ट्रिय कार्यकारी उपाध्यक्ष जेसी शिवप्रसाद भुसाल, एरिया ग का निरुपित राष्ट्रिय उपाध्यक्ष जेसी विमला सुवेदी कार्की, राष्ट्रिय कानुनी सल्लाहकार जेसी गोकुल सापकोटा, राष्ट्रिय महासचिव जेसीआई सेनेटर विकास मानन्धर, राष्ट्रिय उपाध्यक्ष जेसी गौतम शाह, राष्ट्रिय उपाध्यक्ष जेसी राजन गौतमलगायत नेपालभरिका जेसीज शाखाहरुको प्रतिनिधिहरुको उपस्थिति रहेको थियो ।
