हारेर पनि नकआउट चरणमा वेल्स

रोम : वेल्स युरोकप फुटबलको अन्तिम खेलमा पराजित भए पनि अन्तिम १६ मा स्थान बनाउन सफल भएको छ । आइतबार राति भएको खेलमा बलियो प्रतिद्वन्द्वी इटालीसँग १–० गोलले पराजित भए पनि वेल्स उपविजेता बन्दै समूह ‘ए’बाट प्रिक्वार्टरफाइनलमा स्थान बनाएको हो । इटाली भने समूह विजेता बन्दै युरोकपको अन्तिम १६ मा पुगेको छ ।
इटालीको घरेलु मैदान रोममा आइतबार राति समूह चरणको अन्तिम खेलमा वेल्स इटालीसँग १–० गोलले पराजित भएको थियो । ओलम्पिक स्टेडियममा १० खेलाडीमा समेटिएको वेल्सविरुद्ध इटालीलाई जित दिलाउन माटिओ पेसिनाले निर्णायक गोल गरेका थिए । उनले खेलको ३९ औं मिनेटमा निर्णायक गोल गरेका थिए । उनले मार्को भेराट्टीको फ्रिकिक पासमा गोल गरेका हुन् । खेलको ५३ औं मिनेटमा फेड्रिको बेर्नार्डेस्चीको फ्रिकिक पोस्टमा लागेर फर्किदा इटाली अग्रता दोब्बर बनाउन चुकेको थियो ।
खेलको ५६औं मिनेटमा इथान एम्पडुले रातो कार्ड पाएपछि वेल्स १० खेलाडीमा समेटिएको थियो । इटालीका फेड्रिको बेर्नार्डेस्चीलाई फल गरेपछि रेफ्रीले उनलाई सिधै रातो कार्ड देखाएका थिए । इटालीविरुद्ध वेल्सले पनि गोलका केही अवसर बनाएको थियो । तर, त्यसलाई गोलमा परिणत गर्न भने सकेन ।

वेल्सलाई पराजित गरेसँगै समूह ‘ए’ मा रहेको इटालीले समूह चरणमा शतप्रतिशत जित निकालेको छ । इटालीले तीन खेलबाट नौ अंक जोडेको छ । इटाली समूह विजेता बन्दै अन्तिम १६ मा पुगेको छ । पहिलो खेलमा इटालीले टर्कीलाई ३–० ले हराएको थियो । यस्तै दोस्रो खेलमा इटालीले स्विट्जरल्यान्डलाई पनि ३–० गोलले नै पराजित गरेको थियो ।
समूह चरणमा पहिलो हार बेहोरेको वेल्सले तीन खेलमा चार अंक जोड्दै समूहको दोस्रो स्थानमा रह्यो । समूह चरणको पहिलो खेलमा स्विट्जरल्यान्डसँग १–१ गोलको बराबरी खेलेको वेल्सले दोस्रो खेलमा टर्कीलाई २–० गोलले पराजित गरेको थियो ।
यसैगरी आइतबार राति नै भएको खेलमा स्विट्जरल्यान्डले पनि जित निकालेको छ । समूह चरणको अन्तिम खेलमा टर्कीलाई ३–१ गोलले परजित गर्दै स्विट्जरल्यान्डले पहिलो जित निकालेको हो । स्विट्जरल्यान्डलाई जित दिलाउन जेरदान शाकिरीले दुई गोल गरेका थिए । यस्तै हरिस सेफेरोभीले पनि एक गोलको योगदान दिएका थिए । टर्कीका इरफान केभाचीले एक गोल फर्काएका थिए ।
खेलको छैटौं मिनेटमा हरिसले गोल गर्दै स्विट्जरल्यान्डलाई सुरुवाती अग्रता दिलाएका थिए । स्टेभेन जुबेरको पासमा उनले आकर्षक गोल गरेका थिए । २६औं मिनेटमा शाकिरीले गोल गर्दै स्विट्जरल्यान्डलाई २–० गोलको अग्रता दिलाएका थिए । उनले जुबेरकै पासमा डिबक्स क्षेत्र बाहिरबाट उत्कृष्ट गोल गरेका थिए । खेलको ६२ औं मिनेटमा इरफानले गोल गर्दै टर्कीलाई २–१ को स्थितिमा ल्याएका थिए । उनले हकानको पासमा गोल गरेका थिए । त्यसपछि खेलको ६८ औं मिनेटमा जुबेरको पासमा शाकिरीले व्यक्तिगत दोस्रो गोल गर्दै स्विट्जरल्यान्डलाई ३–१ को जित दिलाए ।

समूह चरणको अन्तिम खेलमा जित निकाले पनि स्विट्जरल्यान्ड सिधै नकआउट चरणमा प्रवेश गर्न असफल भएको छ । स्विट्जरल्यान्डले समूहको तेस्रो स्थानमा रहने उत्कृष्ट चार टिम बन्दै अन्तिम १६ मा स्थान बनाउने सम्भावना रहेको छ । जसको लागि सबै समूह चरणको खेल सकिनु पर्नेछ । समूह ‘ए’ मा रहेको स्विट्जरल्यान्डले तीन खेलबाट चार अंक जोडेको छ । वेल्ससँग गोल अन्तरमा पछि पर्दा स्विट्जरल्यान्ड सिधै अन्तिम १६ मा पुग्न असफल भएको हो । समूह चरणको पहिलो खेलमा वेल्ससँग बराबरी खेलेको स्विट्जरल्यान्ड दोस्रो खेलमा इटालीसँग पराजित भएको थियो ।
टर्की भने अंक विहीन बन्दै समूह चरणबाट बाहिरिएको छ । समूहको पुछारमा रहेको टर्कीले अंक जोड्न सकेन । पहिलो खेलमा खेलमा इटालीसँग पराजित टर्की दोसो खेलमा वेल्ससँग पराजित भएको थियो ।