युरोकप फुटबल : युक्रेनको पहिलो जित

बुचारेष्ट : युक्रेनले युरोकप फुटबलमा पहिलो जित निकालेको छ । रोमानिया बुचारेष्टस्थित नेसनल एरिनामा बिहीबार भएको खेलमा नर्थ मेसेडोनियालाई २–१ गोलले पराजित गर्दै युक्रेनले पहिलो जित निकालेको हो ।
युक्रेनलाई जित दिलाउन एन्ड्री यार्मोलेन्को र रोमन यारेमचुकले एक÷एक गोल गरेका थिए । नर्थ मेसेडोनियाका एज्ग्यान अलिओस्कीले एक गोल फर्काएका थिए ।
खेलको सुरुवातदेखि नै आक्रमक खेल खेलेको युक्रेनले २९औं मिनेटमा सुरुवाती अग्रता लिएको थियो । यार्मोलेन्कोले गोल गर्दै युक्रेनलाई अग्रता दिलाएका थिए । यार्मोलेन्को यसअघि दुई पटक वान भर्सस वानमा चुकेका थिए । खेलको ३४औं मिनेटमा यारेमचुकले गोल गर्दै युक्रेनलाई पहिलो हाफमै २–० को अग्रता दिलाएका थिए ।
त्यसपछि खेलको ५७औं मिनेटमा अलिओस्कीले एक गोल फर्काएका थिए । उनले प्रहार गरेको पेनाल्टी युक्रेनका गोलरक्षकले रोके पनि त्यही रिबाउन्डमा उनले गोल गेरका थिए । खेलको ८४औं मिनेटमा युक्रेनले पेनाल्टी पाएको थियो । मेसेडोनियाका खेलाडीले डिबक्सभित्र ह्यान्ड गरेपछि युक्रेनले पेनाल्टी पाएको थियो । तर, रुस्लान मालिनोभ्सकीले त्यसलाई सदुपयोग गर्न सकेनन् । उनको प्रहार नर्थ मेसेडोनियाका गोलरक्षकले विफल पारेका थिए ।
जितसँगै समूह ‘सी’ मा रहेको युक्रेनले दुई खेलबाट तीन अंक जोडेको छ । पहिलो खेलमा युक्रेन नेदरल्यान्ड्ससँग ३–२ गोलले पराजित भएको थियो । युक्रेन समूहको तेस्रो स्थानमा छ । यस समूहमा नेदरल्यान्ड्स पहिलो र अस्ट्रिया दोस्रो स्थानमा छ । नर्थ मेसेडोनियाले भने लगातार दोस्रो हार बेहोरेको छ । मेसेडोनिया समूहमा अन्तिम स्थानमा छ ।