नेपालमाला
२ असार २०७८, बुधबार 
काठमाडौं : साविक विजेता पोर्चुगलका कप्तान क्रिस्टियानो रोनाल्डो युरोकपमा पहिलो खेल खेलिरहँदा केही कीर्तिमान पनि बनाएका छन् । युभेन्ट्सबाट व्यावसायिक फुटबल खेल्ने रोनाल्डो युरोपियन च्याम्पियनसिप (युरोकप) मा लगातार पाँच संस्करण खेल्ने पहिलो खेलाडी बनेका छन् । १६औं संस्करणमा हंगेरीविरुद्धको खेलमा पहिलो रोजाइमा मैदान उत्रिएपछि रोनाल्डोले यो कीर्तिमान बनाएका हुन् ।
३६ वर्षीय रोनाल्डोकै कप्तानीमा पोर्चुगलले युरोकप खेलिरहेको छ । यसअघि उनले सन् २००४ देखि २०१६ सम्म लगातार चार संस्करण खेलेका थिए । रोनाल्डोले पहिलो पटक सन् २००४ मा घरेलु मैदानमै भएको युरोकप खेलेका थिए । त्यसमा पोर्चुगल फाइनलमा पराजित गएको थियो । २०१६ मा रोनाल्डोकै कप्तानीमा पोर्चुगलले फ्रान्सलाई पराजित गर्दै पहिलो पटक उपाधि जितेको थियो ।
यसैगरी रोनाल्डोले आफूले खेलेका पाँचै संस्करणमा गोल पनि गरेका छन् । रोनाल्डोले युरोकपको डेब्यु खेलमा दुई गोल गरेका थिए । यस्तै सन् २००८ मा एक, सन् २०१२ मा तीन र सन् २०१६ मा पनि तीन गोल गरेका थिए । उनले हंगेरीविरुद्धको खेलमा दुई गोल गर्दै युरोकपमा सर्वाधिक गोल गर्ने खेलाडी पनि बनेका छन् । उनले फ्रान्सका मिचेल प्लाटिनीलाई पछि छाड्दै सर्वाधिक गोलकर्ता बनेका हुन् । उनले पोर्चुगलका लागि अहिलेसम्म एक सय ६ गोल गरिसकेका छन् । उनी राष्ट्रका लागि सर्वाधिक गोल गर्ने खेलाडीको सूचीमा दोस्रो स्थानमा छन् । उनीभन्दा अघि इरानका अली देइले एक सय नौ गोल गरेका छन् । रोनाल्डो युरोकपमा सर्वाधिक खेल खेल्ने खेलाडी पनि हुन् । हंगेरीविरुद्धको खेल युरोकपमा उनको २२औं खेल हो ।
‘रोनाल्डो त्यो प्रेरणादायी खेलाडी हुन्, जसले संकटको अवस्थामा पनि टोलीको उद्वार गर्न सक्छन्’, इङ्ल्यान्डका पूर्व स्ट्राइकर क्रिस सटनले भने, ‘उनी निकै चतुर छन् । जुनसुकै अवस्थामा पनि खेल्न सक्छन् ।’
