नेपालमाला
२ असार २०७८, बुधबार 
काठमाडौं : नेपाल तरुण दलका अध्यक्ष जितजंग बस्नेतले बाढी तथा पहिरो प्रभावित क्षेत्रमा उद्वार र राहतमा खटिन तरुण दलका नेता तथा कार्यकर्तालाई निर्देशन दिएका छन् ।
उनले बुधबार एक विज्ञप्ति जारी गर्दै अविरल रुपमा वर्षा भई बाढी पहिरोको कारण केही दिनदेखि सिन्धुपाल्चोक, म्याग्दी, कास्की, दाङ, बाग्लुङ, पाल्पा, मनाङलगायत देशका विभिन्न ठाउँमा ठुलो जनधनको क्षति बेहोरिसकेकाले आफू सुरक्षित भएर उद्वार, राहत र जोखिममा रहेका बस्ती स्थानान्तरणमा जुट्न सम्पूर्ण कार्यकर्तालाई आह्वान गरेका हुन् ।
‘अविरल रुपमा वर्षा भई बाढी पहिरोको कारण केही दिनदेखि सिन्धुपाल्चोक, म्याग्दी, कास्की, दाङ, बाग्लुङ, पाल्पा, मनाङलगायत देशका विभिन्न ठाउँमा ठुलो जनधनको क्षति बेहोरिसकेका छौं । जल तथा मौसम विज्ञान विभागले जनाए अनुसार अझै केहि दिन लगातार वर्षा हुने पूर्वानुमान गरिएको छ । यस्तो समयमा खोला, नदी, नालाहरुमा पानीको बहाव बढ्ने र बाढी र पहिरोको जोखिम पनि उत्तिकै बढी रहने सम्भावना रहन्छ । त्यसैले यस्तो अवस्थामा आफ्नो जिल्ला, क्षेत्रमा हुन् सक्ने विपद जोखिमको पूर्वानुमान गरी सचेत रहन र अरुलाई पनि सचेत गराउन, जोखिममा रहेका बस्तीलाई सुरक्षित ठाउँमा स्थानान्तरण गर्न, उद्धार र राहत वितरण कार्यमा जुट्न जिल्ला एवं स्थानीय तहका सम्पूर्ण तरुण युवा साथीहरुलाई नेपाल तरुण दल केन्द्रिय समिति निर्देशन गर्दछ’, विज्ञप्तिमा भनिएको छ ।
साथै सुरक्षा निकाय, जिल्ला प्रशासन, स्थानीय तह, जनप्रतिनिधि, रेडक्रसलगायत सामाजिक संघसंस्था र मातृ पार्टीका भातृ संगठनसँग पनि समन्वय र सकार्य गरेर विपदको बेला जुट्न अध्यक्ष बस्नेतले परिपत्र गरेका छन् ।
‘यस विपदका बेला कार्य गर्ने सुरक्षा निकाय, जिल्ला प्रशासन, स्थानीय तह, जनप्रतिनिधि, रेडक्रस लगायतका सामाजिक संघ संस्थाहरु एवं मातृपार्टी र अन्य भातृसंगठनसंग पनि आवश्यक समन्वय सहकार्य गर्न निर्देशन सहित यो परिपत्र गरिन्छ’, अध्यक्ष बस्नेतले जारी गरेको विज्ञप्तिमा भनेका छन् ।
