नेपालमाला
२२ जेष्ठ २०७८, शनिबार 
काठमाडौं : नेपाली कांग्रेसको शुभेच्छुक संस्था लोकतान्त्रिक खेलकुद संघ ‘कोमा’बाट अझै ब्युँझिन सकेको छैन । नेपाली खेलकुदमा विभिन्न उतारचढाव र घटनाक्रम भइरहँदा पनि लोकतान्त्रिक संघ भने ‘कुम्भकर्ण’कै निन्द्रामा मस्त छ ।
कार्यालय नै लिलाम गरेर तितरवितर भइसकेको संघलाई गत माघमा नेपाली कांग्रेसको खेलकुद विभाग प्रमुख मोहनबहादुर बस्नेतले पुनः एकत्रित पारेका थिए । नेपाली खेलकुदको विकास र विस्तारमा केही काम गर्ने विश्वासका साथ पहिलेकै अध्यक्ष देवेन्द्र शेरचनको नेतृत्वमा लोकतान्त्रिक खेलकुद संघलाई बस्नेतले ब्युउँताएका थिए । तर, दुर्भाग्य संघका पदाधिकारी पद लिने बेलामा मात्र ब्युउँझिए, त्यसपछि कुम्भकर्णझैं मस्त निन्द्रामा निदाउन पुगे ।
लोकतान्त्रिक खेलकुद संघको नेतृत्व लिने क्रममा खेलाडीलाई फुर्सदमा बस्न नदिइ लगातार खेलकुद गतिविधि सञ्चालन गरिरहने दाबी गरेका शेरचन आफै निरन्तर रुपमा ‘फर्सद’मा बसिरहेका छन् । जसका कारण पुनस्थापना भएको लामो समय भइसक्दा पनि संघले कुनै काम गर्न सकेको छैन । देवेन्द्र शेरचनको नेतृत्व असक्षम मात्र होइन, निकम्मा सावित भएको छ ।
केन्द्र चिरनिन्द्रामा मस्त रहँदा लोकतान्त्रिक खेलकुद संघ बागमती प्रदेश भने निकै जुर्मुराएको थियो । बागमती प्रदेशले पूर्व प्रधानमन्त्री कृष्णप्रसाद भट्टराईको स्मृतिमा हाफ म्याराथनलगायत केही कार्यक्रम पनि आयोजना ग¥यो । तर, बागमती प्रदेशले जति काम ग¥यो त्योभन्दा बढी प्रचार मात्रै ग¥यो । कोरोना महामारीको अहिलेको विषम् परिस्थितिमा खेलाडी र खेलकर्मीको हितमा विभिन्न कार्यक्रम सञ्चालन गर्ने घोषणा गरेको बागमती प्रदेशले त्यसलाई घोषणामै सीमित राखेको छ । महामारीको समयमा खेलकर्मीहरुलाई आवश्यक सहयोग जुटाउने घोषणा गरिए पनि रकम उठाउने र फेसबुकमा प्रचार गर्ने काम मात्रै गर्दै आएको छ । लोकतान्त्रिक खेलकुद संघ बागमती प्रदेशको फेसबुकमा पदाधिकारीको नामावलीलाई दिनमा दुई÷चार पटक पोस्ट् गर्नु बाहेक खेलाडी र खेलकर्मीको हितमा अहिलेसम्म कुनै काम गर्न सकेको छैन । कोरोनाको क्रुर चक्रमा परेर दिनहुँजसो खेलाडी र खेलकर्मीले जीवन गुमाइरहेका छन् । कोरोनाबाट जोगिएकाहरुलाई पनि दैनिक जीवन धान्न धौधौ परिरहेको छ । खेलाडी र खेलकर्मीलाई सहयोगको उद्घोष गरेको लोकतान्त्रिक खेलकुद संघ बागमती प्रदेशले अहिलेसम्म न कसैलाई सहयोग गरेको छ न त राहत नै उपलब्ध गराएको छ । संघका पदाधिकारीले खेलाडी र खेलकर्मीको नाममा सहयोग उठाउने र सामाजिक सञ्जालमा रमाउने बाहेक अरु काम गर्न सकेका छैनन् ।
संघको घोषणाप्रति व्यंङ्ग्य गर्दै एक खेलकर्मीले मुख अमिलो बनाएर दुखेसो पोखे, ‘केन्द्र नै निकम्मा भएपछि अरुको आशा गर्नु पनि मुर्खता हो ।’
यो पनि पढ्नुस्
