नेपालमाला
२० जेष्ठ २०७८, बिहीबार 
काठमाडौं : नेपालले फिफा विश्वकप छनोट खेलमा प्रभावशाली जित निकालेको छ । अर्को वर्ष कतारमा आयोजना हुने फिफा विश्वकपअन्तर्गत एसियाली छनोट र सन् २०२३ को एसिया कपको दोस्रो चरणको छनोट खेलमा नेपालले चाइनिज ताइपेईलाई २–० गोलले पराजित गरेको हो ।
कुवेतको राजधानी कुवेत सिटीमा बिहीबार भएको खेलमा नेपालले सुरुवातदेखि नै आक्रामक खेल खेलेको थियो । नेपाली टोलीका मुख्य प्रशिक्षक अब्दुल्लाह अलमुताइरीले तीन स्ट्राइकर खेलाएका थिए । नेपालले चौथो मिनेटमा नै अग्रता लिएको थियो । अञ्जन विष्टले पेनाल्टीमा गोल गर्दै नेपाललाई १–० को अग्रता दिलाएका थिए । नेपालले तेस्रो मिनेटमा नै पेनाल्टी पाएको थियो । सन्तोष तामाङको फ्रिकिकमा चाइनिज चाइपेईका खेलाडीले पेनाल्टी क्षेत्रभित्र ह्यान्ड गरेपछि नेपालले पेनाल्टी पाएको थियो । जसलाई अञ्जनले सदुपयोग गरेका थिए । नेपालले दुई वर्ष अघि चाइनिज ताइपेईलाई उसैको घरेलु मैदानमा २–० गोलले पराजित गर्दा दुवै गोल अञ्जनले नै गरेका थिए ।
पहिलो हाफमा १–० को अग्रता बनाएको नेपालले दोस्रो हाफमा पनि खेलमा पक्कड बनाएको थियो । विपक्षी पोस्ट्मा लगातार आक्रमण बुनेको नेपालले ८१औं मिनेटमा अग्रता दोब्बर बनाएको थियो । केही मिनेटअघि मात्र मैदान प्रवेश गरेका नवयुग श्रेष्ठले गोल गर्दै नेपाललाई २–० को जित दिलाए । सुमन अर्यालले उपलब्ध गराएको पासमा नवयुगले बललाई जाली चुमाएका थिए ।
कोरोना महामारीका कारण यसअघि पटकपटक स्थगित हुँदै आएको विश्वकप छनोटको खेल न्युट्रल भेन्यु कुवेतमा खेलाइएको हो । नेपालले घरेलु मैदानमा खेल्नुपर्ने खेलहरू कोरोना महामारीका कारण एसियाली फुटबल महासंघ (एएफसी) ले सेन्ट्रल भेन्युका रूपमा कुवेतमा खेलाएको हो ।
विश्वकप छनोटका खेलको तयारीका लागि नेपालले विश्व फुटबल महासंघ (फिफा) वरीयतामा निकै माथि रहेको इराकसँग गत शनिबार मैत्रीपूर्ण खेल खेलेको थियो । दुई दशकपछि इराकविरुद्ध मैदान उत्रिएको नेपाल ६–२ गोलले पराजित भएको थियो । फिफाको पछिल्लो वरीयतामा नेपाल एक सय ७१औं स्थानमा छ भने इराक ६८औं स्थानमा छ । इराकसँगको मैत्रीपूर्ण खेलपछि नेपाली टोली स्थलमार्ग हुँदै कुवेत पुगेको होे । नेपाली टोलीले आइतबारदेखि कुवेतमै तयारी गरेको थियो । फिफाको पछिल्लो वरीयतामा नेपाल १ सय ७१औं र चाइनिज ताइपेई १ सय ४१औं स्थानमा छन् ।
विश्वकप छनोटअन्तर्गत नेपालले आठ खेलमध्ये ६ खेल खेलिसकेको छ । नेपालले कुवेतसँगको पहिलो खेलमा ७–० र दोस्रो खेलमा १–० गोलले हार बेहोरेको थियो । नेपाल अस्ट्रेलियासँगको पहिलो खेलमा ५–० र जोर्डनसँग ३–० गोलले पराजित भएको थियो । नेपालले चाइनिज ताइपेईलाई मात्र दुवै लेगको खेलमा पराजित गर्न सकेको छ । नेपालले अब जुन ७ मा जोर्डन र जुन ११ मा बलियो प्रतिद्वन्द्वी अस्ट्रेलियाको सामना गर्नेछ ।
अहिले समूह ‘बी’मा १२ अंकसहित अस्ट्रेलिया शीर्ष स्थानमा छ । कुवेत १० अंकसहित दोस्रो, १० नै अंक बनाएको जोर्डन तेस्रो स्थानमा छ । नेपाल ६ अंकसहित चौथो र अंक जोड्न नसकेको चाइनिज ताइपेई पुछारमा छ ।
यस जितसँगै विश्वकप छनोटको अघिल्लो चरणमा पुग्ने नेपालको सम्भावना गणितीय हिसावमा बाँकी छ । तर, सन् २०२३ मा हुने एसियन कपमा सिधै छनोट हुने सम्भावना भने बलियो बनाएको छ । नेपाल समूहमा चौथो स्थानमै रहन सकेमा एसिया कपका लागि सीधै छनोट हुनेछ ।
