नेपालमाला
५ जेष्ठ २०७८, बिहीबार 
काठमाडौं : सरकारले संसद्को बर्खे अधिवेशन जेठ ९ गते बोलाउन सिफारिस गरेको छ। बिहीबार बसेको मन्त्रिपरिषद् बैठकले जेठ ९ गतेका लागि संसद्को बर्खे अधिवेशन बोलाउन राष्ट्रपति विद्यादेवी भण्डारीसमक्ष सिफारिस गरेको हो।
सरकारको निर्णय अनुसार राष्ट्रपतिबाट संसद्को बर्खे अधिवेशन आह्वान भएपछि सरकारले बजेट ल्याउनेछ। जेठ १५ गते बजेट ल्याउनुपर्ने संवैधानिक प्रावधान रहेको छ।
बिहीबार बसेको मन्त्रिपरिषद् बैठकमा विश्वासको मत नलिने र संविधानको धारा ७६ को उपाधारा (५) अनुसार सरकार अगाडि बढने बताएका छन्।
वैशाख ३० गते बहुमतको सरकारका लागि विपक्षी गठबन्धनको दाबी नपरेपछि संविधानको धारा ७६ को उपधारा (३) बमोजिम प्रधानमन्त्री बनेका ओलीले एक महिनाभित्र विश्वासको मत दिनुपर्ने संवैधानिक प्रावधान रहेको छ।
सरकारका प्रवक्ता सञ्चार तथा सूचना प्रविधिमन्त्री पार्वत गुरुङका अनुसार सरकारले विश्वासको मत प्राप्त गर्ने आधार नभएकाले ओलीले मार्ग प्रशस्त गर्ने निर्णय लिएका हुन्।
