नेपालमाला
२८ बैशाख २०७८, बुधबार 
काठमाडौं : नेपाल सुपर लिग (एनएसएल) को दोस्रो प्लेअफमा आज ललितपुर सिटी एफसी र बुटवल लुम्बिनी एफसीबीच प्रतिस्पर्धा हुँदैछ ।त्रिपुरेश्वरस्थित दशरथ रंगशालामा हुने दोस्रो प्लेअफ खेल साँझ ५:३० बजे सुरु हुनेछ । आज दुबै टोली जित निकाल्दै इलिमिनेटरमा काठमाडौं रेजर्ससँगको भेट पक्का गर्न चाहन्छ । पहिलो प्लेअफमा धनगढी एफसीसँग पराजित भएपनि प्रतियोगिताको फर्म्याट अनुसार काठमाडौंले इलिमिनेटर खेल्ने मौका पाएको हो । लिग चरणको खेलमा ललितपुरले तेस्रो र बुटवलले चौथो स्थानमा रहदै प्लेअफमा स्थान बनाएका हुन् ।
यस खेलको विजेताले फाइनल प्रवेशका लागि इलिमिनेटरमा काठमाडौंसँग खेल्नेछ । पराजित हुने टिम प्रतियोगिताबाट बाहिरिनेछ । लिग चरणको भेटमा बुटवलविरुद्ध ललितपुरले बाजी मारेको थियो । ललितपुरका लागि अजरबैजानका खेलाडी नुर्लान जाहिदले निर्णायक गोल गरेका थिए । त्यसैले प्लेअफमा बुटवल ललितपुरविरुद्ध लिग चरणमा व्यहोरेको हारको बदला लिन चाहन्छ । त्यसका लागि बुटवल तयार समेत रहेको छ । ‘तयारी राम्रो छ । ललितपुरविरुद्ध जित्नको लागि खेल्छौं,’ गोलकिपर प्रशिक्षक समेत रहेको उज्ज्वल मानन्धरले भने ।
बुटवलका मार्की खेलाडी हुन् गोलरक्षक विशाल श्रेष्ठ । तर, पछिल्लो धनगढीविरुद्धको खेलमा भने विराज महर्जनले टोलीको कप्तानी सम्हालेका थिए । प्लेअफमा समेत विराजले नै टोलीको कप्तानी समाल्नेछन् । ‘खेल निकैनै प्रतिस्पर्धात्मक हुन्छ । पछिल्लो समय हाम्रो स्कोर निस्किरहेको छैन । त्यसलाई जोड गरेर गोल निकाल्नमै केन्द्रित हुन्छौं,’ राष्ट्रिय टोलीका पूर्व कप्तान समेत रहेका विराज भन्छन् ।
ललितपुरविरुद्ध मैदान उत्रदै गर्दा बुटवललाई कुनै पनि खेलाडीको चोटले सताउने छैन् । पहिलो खेलमा पोखरा थण्डर्सलाई पराजित गरेको बुटवलले अन्तिम खेलमा धनगढी एफसीलाई पराजित गर्दै ‘हेड टु हेड’मा पोखरालाई पछाडी पारेर शीर्ष चारमा स्थान बनाएको थियो । पछिल्ला दुई खेलमा शतप्रतिशत जित निकाल्दै प्लेअफमा स्थान बनाएको ललितपुर बुटवलविरुद्ध जित निकाल्दै लगातार तेस्रो जित निकाल्ने दाउँमा हुनेछ ।
मुख्य प्रशिक्षक प्रदिप हुँमागाईको बर्खास्तीसँगै टोलीको प्रशिक्षण सहायक प्रशिक्षक राजु तामाङले गरिरहेका छन् । उनले जागेको लाखेलाई रोक्न गाह्रो हुने प्रतिक्रिया दिँदै बुटवलविरुद्ध जितका लागि खेल्ने बताएका छन् । ‘खेलाडी उत्साहित छन् । गाह्रो अवस्थाबाट माथि उठेका छौं । खेलाडीमा आत्माविश्वास छ । जित्नकै लागि खेल्छौं,’ पूर्व राष्ट्रिय खेलाडी तामाङले भने । ललितपुरका मार्की खेलाडी तथा कप्तान अन्जन विष्टले अन्तिम दुई खेलको जितले आत्माविश्वास बढेको र सोहि नतिजा दिलाउन खेल्ने बताए । ‘लगातार दुई खेलले विश्वास दिलाएको छ । खेलाडी खेल्न तयार छन् । हामी जित्नको लागि खेल्छौं,’ अन्जन भन्छन् ।
बुटवलविरुद्ध ललितपुरलाई अन्जन सहित, एरिक बिष्ट, विमल राना, मिक्छेन तामाङ, निरज बस्नेत, प्रवेश कुँवर, विदेशी खेलाडी नुर्लान जाहिद र पिटर सेगुन जस्ता खेलाडीको साथ रहनेछ । बुटवललाई समेत युवा र अनुभवी खेलाडीको साथ रहनेछ । ललितपुरविरुद्ध बुटवल तीन युवा स्ट्राइकर आशिष लामा, सुमन लामा र अभिषेक रिजाल अट्याक भुमिका रहनेछन् । यस्तै लक्ष्मण रुचाल, विलिम, मान बहादुर परियार, सेसेहाङ आङदेम्बे, विशाल श्रेष्ठ र विराज महर्जनले टोलीलाई साथ दिनेछन् ।
लिग चरणमा ललितपुरको नतिजा
काठमाडौंविरुद्ध ललितपुर सिटी १–०
ललितपुर सिटीविरुद्ध चितवन १–१
ललितपुरसिटीविरुद्ध धनगढी १–१
पोखराविरुद्ध ललितपुर सिटी ०–०
ललितपुर सिटीविरुद्ध बुटवल लुम्बिनी १–०
विराटनगरविरुद्ध ललितपुरसिटी ०–४
बुटवलको नतिजा
पोखराविरुद्ध बुटवल लुम्बिनी ०–२
चितवनविरुद्ध बुटवल लुम्बिनी २–२
बुटवल लुम्बिनीविरुद्ध विराटनगर २–२
बुटवल लुम्बिनीविरुद्ध काठमाडौं ०–१
ललितपुर सिटीविरुद्ध बुटवल लुम्बिनी १–०
धनगढीविरुद्ध बुटवल लुम्बिनी ०–१
