नेपालमाला
१६ बैशाख २०७८, शुक्रबार 
काठमाडौं : पृथ्वी शको उत्कृष्ट ब्याटिङ मद्दतमा दिल्ली क्यापिटल्सले इन्डियन प्रिमियर लिग (आईपीएल) मा कोलकाता नाइट राइडर्सलाई ७ विकेटले पराजित गरेको छ । यस जितपछि दिल्ली अंक तालिकामा दोस्रो स्थानमा उक्लेको छ ।
अहमेदाबादमा बिहीबार राति भएको खेलमा कोलकताले दिएको १५५ रनको लक्ष्य दिल्लीले १६.३ ओभरमा ३ विकेट गुमाएर पूरा गर्यो । दिल्लीको जितमा ओपनर पृथ्वी शले ८२ रन बनाए । उनले ४१ बल खेल्दै ११ चौका र ३ छक्का प्रहार गरे । अर्का ओपनर शिखर धवनले ४६ रन बनाए । कप्तान ऋषव पन्त १६ रन बनाएर आउट भए । कोलकाताका लागि ३ विकेट नै प्याट कमिङ्सले लिए ।
त्यसअघि टस हारेर पहिले ब्याटिङ गरेको कोलकताले २० ओभरमा ६ विकेट गुमाएर १५४ रन बनाएको थियो । कोलककता लागि आन्द्रे रसेलले अविजित रहँदै सर्वाधिक ४५ रन बनाए । उनले २७ बल खेल्दै २ चौका र ४ छक्का प्रहार गरे । यस्तै सुबमन गिलले ४३ रन जोडे भने राहुल त्रिपाठीले १९, नितिश रानाले १५ र दिनेश कार्तिकले १४ रन बनाए । प्याट कमिङ्स ११ रनमा अविजित रहे । दिल्लीका अक्सर पटेल र ललित यादवले २-२ विकेट लिए ।
यस सिजन पाँचौ जित हात पारेको दिल्ली ७ खेलबाट १० अंक जोड्दै अंक तालिकामा दोस्रो स्थानमा उक्लेको छ । शीर्ष स्थानको चेन्नाईसमान अंक भए पनि रनरेटमा दिल्ली पछि छ । उता रोयल च्यालेन्जर्स बैंगलोरलाई भने दिल्लीले समान अंक भएपनि रनरेटमा पछि पारेको छ ।कोलकताको भने यो पाँचौ हार हो । ७ खेलबाट ४ अंक मात्र रहेको कोलकता पाँचौ स्थानमै यथावत छ ।
