नेपालमाला
१२ माघ २०७७, सोमबार 
दाङ: प्रधानमन्त्री तथा नेकपा ओली समूहका अध्यक्ष केपी शर्मा ओलीले आफुहरुले सुमधुर धुन बजाउँदा दाहाल-नेपाल समूह धामी नाच नाचिरहेको टिप्पणी गरेका छन् ।
‘राजनीति स्वस्थ राजनीति हुनुपर्छ भन्ने हो तर उनीहरु अस्थिरता खोज्ने जनताको राम्रो भन्दा पनि आफनो स्वार्थमा रहेर धामी नाच नाचेका छन्,’ ओलीले भने ।
यस्तै निर्वाचन हारेकाहरुले रेष्टुरेन्ट र चौतारीमा बसेर आफुलाई कारवाहीको नाटक गरेको पनि उनको टिप्पणी छ । उनले भनेका छन्, ‘मैले राजनीति सिकाएकाहरुले मलाई नै पार्टी अध्यक्ष र साधाराण सदस्य समेत नरहने गरी कारवाही गरे रे ! पार्टीको बैठकमा नआउने २/४ जनाले रेष्टुरेन्टमा बसेर कारवाही गरे भन्दैमा कारवाही हुन्छ ?’
दाङको देउखुरीमा सोमवार नेकपाले गरेको वृहत जनसभालाई सम्वोधन गर्दै ओलीले यस्तो बताएका हुन् । उनले अहिलेसम्म पार्टी एकजुट भएको भन्दै गल्ती महशुस गरेर आए स्वागत गरिने पनि बताए ।
राजनीतिक अस्थिरता ल्याउने र देशलाई बन्दी बनाउने तत्वहरुलाई ठेगान लगाउन निर्वाचन घोषणा गरिएको समेत ओलीले बताएका थिए ।
प्रचण्ड र नेपाललाई लक्षित गर्दै उनले लडाइँमा सिङ फुक्लिएको साँढे जसरी (भाँचिएको) फुक्लिएको सिङ लिएर हिँडिरहेको समेत आरोप लगाए । ‘धेरै फाँफु गरिरहेका छन् । यीनीहरुको फाँफुले केही हुने वाला छैन,’ उनले भने । तीखे गोरुको कथा सुनाउँदै ओलीले नाम उच्चारण नगरेरै प्रचण्ड र नेपाल सहूहलाई भने, अहिले उनीहरु फुक्लिएको सिङ बोकेर हिँडेको टिप्पणी गरे ।
