नेपालमाला
१० पुष २०७७, शुक्रबार 
काठमाडौं : बरिष्ठ भलिबल प्रशिक्षक तथा राष्ट्रिय खेलकुद परिषद्अन्तर्गत खेलकुद विज्ञान प्रतिष्ठान (सान) का निर्देशक सुदेशकुमार रिमालको ५६ वर्षको उमेरमा निधन भएको छ ।
ब्रेन स्टोक भइ गत सोमबार बाँसबारीस्थित न्युरो अस्पतालमा भर्ना भएका उनको शुक्रबार साँझ निधन भएको हो । उनको टाउकाको शल्यक्रिया गर्ने तयारी हुँदाहुँदै निधन भएको बुझिएको छ ।
रिमाल नेपालका उत्कृष्ट प्रशिक्षकमध्येमा गनिन्छन् । उनले विभिन्न समयमा राष्ट्रिय टोलीसँगै विभागीय टोलीको समेत प्रशिक्षकको जिम्मेवारी सम्हालेका थिए । उनकै प्रशिक्षणमा गत मंसिरमा नेपालमा आयोजना भएको १३औं दक्षिण एसियाली खेलकुदअन्तर्गत महिला बिच भलिबलमा नेपाले कांस्य पदक जितेको थियो । त्यसअघि सन् २०१४ मा नेपालमै आयोजना भएको दक्षिण एसियाली आमन्त्रण महिला भलिबल प्रतियोगितामा नेपालले ऐतिहासिक रजत पदक जित्दा पनि रिमाल नै मुख्य प्रशिक्षक थिए । उनले सन् १९९९ मा नेपालमै आयोजना भएको आठौं दक्षिण एसियाली खेलकुद प्रतियोगिताबाट राष्ट्रिय टोलीको प्रशिक्षण सम्हाल्दै आएका थिए ।
लामो समयदेखि भलिबलमा क्रियाशील रिमालको निधनले नेपाली भलिबललाई ठूलो क्षति पुगेको बरिष्ठ भलिबल प्रशिक्षक कपिलकिशोर श्रेष्ठले बताए । ‘निकै अनुभवी प्रशिक्षकको निधनले नेपाली भलिबललाई ठूलो क्षति पुगेको छ’, श्रेष्ठले भने, ‘उनको अभाव नेपाली भलिबलमा लामो समयसम्म खड्किरहने छ ।
यसैगरी नेपाल भलिबल संघका महासचिव जितेन्द्रबहादुर चन्दले पनि रिमालको निधनबाट नेपाली खेलकुद र भलिबललाई अपूरणीय क्षति पुगेको बताए । ‘शुक्रबार नेपाली भलिबलका लागि दुखद् दिन रह्यो । रिमालको निधनले नेपाली भलिबललाई अपूरणीय क्षति पुगेको छ’, उनले भने । रिमालले अर्को वर्ष चीनमा आयोजना हुन लागेको एसियन बिच गेम्समा पनि नेपाली भलिबल टोलीको प्रशिक्षकको जिम्मेवारी सम्हाल्ने तयारीमा रहेको चन्दले जानकारी दिए ।
पर्साका स्थायी बासिन्दा रिमाल खेलाडीका रुपमा सन् १९८६ को एसियाली खेलकुदमा सहभागी भएका थिए । दक्षिण कोरियाको सियोलमा भएको १०औं एसियाली खेलकुदमा उनी राष्ट्रिय टोलीको सदस्य थिए । उनी भलिबलको प्रमुख प्रशिक्षक हुँदै सानको निर्देशक बनेका थिए । उनले खेलाडी जीवन टुङ्ग्याउँदै पटियाला कोर्स गरेर प्रशिक्षक जीवन सुरु गरेका थिए ।
उनको श्रीमती, एक छोरा र एक छोरी छन् ।
