नेपालमाला
१५ मंसिर २०७७, सोमबार 
काठमाडौं : नेपालमा सोमबारसम्म ३७५ जनाको आइसीयू र ५८ जनाको भेन्टिलेटरमा उपचार भइरहेको छ। सोमबार मात्रै थप १४ सय ७४ जनामा कोरोना संक्रमण देखिएको छ भने २९ जनाको मृत्यु भएको छ। हालसम्म कोरोनाबाट १५ सय ८ जनाले ज्यान गुमाइसकेका छन्।
आइसीयूमा उपचार गराइरहेका मध्ये सबैभन्दा बढी १५९ जना बागमती प्रदेशका छन्। त्यसपछि गण्डकी प्रदेशमा ९४ जनाको आइसीयुमा उपचार भइरहेको छ। यस्तै लुम्बिनी प्रदेशमा ७२ जना, प्रदेश १ मा ३२ जना, कर्णाली प्रदेशमा ९ जना, सुदूरपश्चिम प्रदेशमा ५ जना र प्रदेश २ मा ४ जनाको उपचार भइरहेको स्वास्थ्य तथा जनसंख्या मन्त्रालयले जनाएको छ।
यस्तै भेन्टिलेटरमा उपचार गराइरहेका मध्ये बागमती प्रदेशका बढी छन्। ३५ जना बागमती प्रदेशका, गण्डकीका ११ जना, प्रदेश १ का ६ जना,लुम्बिनी प्रदेशका ३ जना, प्रदेश २ मा १ जना र सुदूरपश्चिम प्रदेशका २ जना कोरोनाका बिरामीको भेन्टिलेटरमा उपचार भइरहेको छ। कर्णाली प्रदेशमा भने भेन्टिलेटरमा कोरोनाका बिरामी छैनन्।
