नेपालमाला
२९ कार्तिक २०७७, शनिबार 
काठमाडौं : कीर्तिपुर–५ पृथ्वीचोक निवासी केदारबहादुर केसीको ‘छेउ न टुप्पोको गन्थन’ पुस्तकको शनिबार विमोचन गरिएको छ ।
त्रिभुवन विश्वविद्यालयका सेवा निवृत्त कर्मचारी केसीले आफूले जीवनमा देखे भोगेका विभिन्न विषयवस्तु समेटिएको पुस्तकको कीर्तिपुर नगरपालिका वडा नम्बर ४ का अध्यक्ष राजेन्द्र बानियाँले विमोचन गरे ।
उनले पुस्तकको विमोचन गर्दै विभिन्न समयमा आफूले भोगेका विषयहरुलाई लेखक केसीले यथार्थपरक रुपमा पुस्तकमा उतारेको बताए । उनले पुस्तकले तत्कालिक समयका विभिन्न विषयवस्तु र घटनाक्रमलाई साक्षात्कार गराउने धारणा राखे ।
पुस्तकका लेखक केसीले आफूले जीवनमा भोगेका सुखदुःखका सँगालोलाई ‘छेउ न टुप्पोको गन्थन’मा उतारेको बताए । उनले आफूले गरेका दुःखका बारेमा आफ्ना सन्ततीले पनि थाहा पाउन् भनेर पुस्तक प्रकाशन गरेको बताए ।
कार्यक्रममा ध्रुव बस्नेत, लक्ष्मी पोखरेललगायतले पुस्तकमा समेटिएका विषयवस्तु र त्यसको प्रस्तुतिका बारेमा प्रकाश पारेका थिए ।
‘छेउ न टुप्पोको गन्थन’को प्रकाशकमा संगीता केसी रहेकी छन् । पुस्तकलाई नारायण बस्नेत र ध्रुव बस्नेतले सम्पादन गरेका छन् ।
