नेपालमाला
२७ कार्तिक २०७७, शुक्रबार 
काठमाडौं : कोरोना भाइरस महामारीका कारण लामो समय विश्राममा रहेको नेपाली राष्ट्रिय पुरुष फुटबल टोलीले शुक्रबार बंगलादेशसँग मैत्रीपूर्ण फुटबल खेल्दै छ । ढाकाको बंगबन्धु रंगशालामा हुने खेलमा नेपालको लक्ष्य जित रहेको टोलीका प्रशिक्षक बालगोपाल महर्जनले बताएका छन् ।
एक साताअघि ढाका पुगेको नेपाली टोलीले क्वारेन्टाइनमा बसेर कोरोना परीक्षणसँगै तयारी पनि गरेको छ । नेपालले बंगलादेश फुटबल संघको निमन्त्रणामा दुईवटा मैत्रीपूर्ण खेल खेल्न लागेको हो । दोस्रो खेल नोभेम्बर १७ मा हुनेछ । कोरोनाका कारण सामान्य तयारी गरेर ढाका पुगेको नेपाली खेलाडीको मनोबल उच्च रहेको दाबी प्रशिक्षक महर्जनले गरेका छन् । ‘बंगबन्धु रंगशाला नेपाली टोलीका लागि परिचित छ । यहाँ नेपालले स्मरणीय उपलब्धि हात पारेको इतिहास छ । मैत्रीपूर्ण खेलमा पनि हामी उत्कृष्ट प्रदर्शन गर्नेछौं । हामी जित्ने लक्ष्यका साथ उत्रनेछौं’, महर्जनले भने ।
नेपालले बंगलादेशसँगको खेलका लागि दशैंलगत्तै अभ्यास सुरु गरेको थियो । अधिकांश युवा र केही पुराना खेलाडीको सम्मिश्रण रहेको नेपाली टोलीमा २५ खेलाडी छन् । चोटका कारण रोहित चन्द टोलीमा समावेश छैनन् । टोलीको सहायक प्रशिक्षकमा किरण श्रेष्ठ र गोलकिपिङ प्रशिक्षकमा विकास मल्लले जिम्मेवारी पाएका छन् । नेपालले यस खेललाई सन् २०२२ मा कतारमा आयोजना हुने फिफा विश्वकप छनोटको तयारीका रूपमा लिएको छ ।
विश्वकप छनोटअन्तर्गत एसियाली देशको समूह ‘बी’मा रहेको नेपालले अब चाइनिज ताइपेई, अस्ट्रेलिया र जोर्डनसँग तीनवटा खेल खेल्न बाँकी छ । एसियन फुटबल महासंघ (एएफसी)ले कोरोनाका कारण स्थगित भएको छनोट खेलको नयाँ मितिसमेत सार्वजनिक गरिसकेको छ । एएफसीले फिफा विश्वकप छनोट र एसियन कप छनोटको दोस्रो चरणअन्तर्गतका बाँकी खेलहरू सन् २०२१ को जुन १५ सम्म सम्पन्न गर्ने जनाएको छ ।
एएफसीको प्रतियोगिता समितिको बुधबार सम्पन्न बैठकले विश्वकप छनोट र एसियन कप छनोटका बाँकी खेल जुन १५ भित्र सक्ने निर्णय गरेको हो । कोरोना भाइरसको महामारीका कारण यसअघि अक्टोबर र नोभेम्बरमा तय गरिएका छनोट खेलहरू स्थगित भएको थियो । नेपालले बाँकी तीनवटै खेल दशरथ रंगशालामा खेल्नेछ ।
नेपालले यसअघि पाँच खेल खेलिसकेको छ । नेपालले यसअघिका चाइनिज ताइपेईलाई मात्र २–० गोलले हराएको थियो । नेपाल आफ्नो पहिलो खेलमा कुवेतसँग ७–० र दोस्रो खेलमा १–० गोलले पराजित भएको थियो । नेपाल अस्ट्रेलियासँगको पहिलो खेलमा ५–० र जोर्डनसँग ३–० गोलले पराजित भएको थियो ।
अहिले समूहमा १२ अंकसहित अस्ट्रेलिया शीर्ष स्थानमा छ । कुवेत १० अंकसहित दोस्रो, १० नै अंक बनाएको जोर्डन तेस्रो, नेपाल तीन अंकसहित चौथो र अंकविहीन चाइनिज ताइपेई पुछारमा छ ।
