नेपालमाला
२७ कार्तिक २०७७, बिहीबार 
काठमाडौं : काठमाडौं उपत्यकामा मात्र संक्रमितको संख्या ९३ हजार ८०९ पुगेको छ। उपत्यकामा पछिल्लो २४ घण्टामा ९७३ संक्रमित थपिएको स्वास्थ्य तथा जनसंख्या मन्त्रालयले जनाएको छ।
मन्त्रालयका अनुसार थप ५४५ पुरुष र ४२८ पुरुषमा सक्रमण पुष्टि भएको हो। उपत्यकामा काठमाडौं जिल्लामा मात्र ७६ हजार ८४ जनामा संक्रमण पुष्टि भएको छ। १७ हजार ४५ सक्रिय संक्रमित रहेको काठमाडौंमा ५८ हजार ७८४ जना डिस्चार्ज भएका छन् भने २९३ जनाको मृत्यु भएको छ।
भक्तपुरमा ६ हजार ८४८ जनामा संक्रमण पुष्टि भएको छ भने १२ सय ९२ जना सक्रिय संक्रमित रहेका छन्। ५ हजार ४८१ जना निको भएको भक्तपुरमा ७५ जनाको मृत्यु भएको छ।
१० हजार ८७७ जनामा संक्रमण पुष्टि भएको ललितपुरमा २५ सय १२ जना सक्रिय संक्रमित छन् भने ८ हजार २८६ जनाले कोरोना जितेका छन्। लतिलपुरमा मात्र ७९ जनाको मृत्यु भएको छ।
पछिल्लो २४ घण्टामा १० हजार २२ जनाको पीसीआर परीक्षण गर्दा देशभर १९ सय १३ जनामा संक्रमण पुष्टि भएको छ। योसँगै नेपालमा संक्रमितको संख्या २ लाख ४४२ पुगेको छ।
मन्त्रालयका अनुसार २४ घण्टामा २३ सय ४९ जनाले कोरोना जितेका छन्। योसँगै कोरोना जित्नेको संख्या १ लाख ६४ हजार ५९२ पुगेको छ। बिहीबार थप १५ जनाको मृत्यु भएसँगै कोरोनाले ज्यान गुमाउनेको संख्या भने ११ सय ८९ पुगेको छ।
अहिले ९७४ जना क्वारेन्टाइनमा छन् भने सक्रिय संक्रमितको संख्या ३८ हजार ४६१ रहेको मन्त्रालयले जनाएको छ। नेपालमा १५ लाख ८४ हजार ३१७ जनाको पीसीआर परीक्षण गरिएको छ।
