स्वास्थ्य परीक्षण गरेर मात्र सांसद बैठकमा जान पाउने

काठमाडौं : प्रतिनिधिसभा र राष्ट्रियसभाका सांसदहरुमा आजबाट कोरोना भाइरस संक्रमण भए-नभएको परीक्षण सुरु गरिएको छ । शुक्रबारदेखि संघीय संसदको वर्षे अधिवेशन सुरु हुने भएकाले सांसदहरुको स्वास्थ्य परीक्षण गर्न लागिएको हो ।

राष्ट्रिय सभा सांसदहरुको परीक्षण बिहान १० बजेदेखि र प्रतिनिधिसभा सांसदहरुको ११ बजेदेखि पीसीआर प्रविधिबाट कोरोना परीक्षण हुनेछ ।

संघीय संसद भवनकै ल्होत्से हलमा कोरोना परीक्षणको व्यवस्था मिलाइएको सूचना अधिकारी दशरथ धमलाले जानकारी दिए । एकै दिनमा स्वाब संकलन गरिसक्ने सचिवालयको लक्ष्य छ ।

मंगलबार बसेको कार्यव्यवस्था परामर्श समितिको बैठकले स्वास्थ्य मन्त्रालयलाई संसद भवन छिर्नेहरुको स्वास्थ्य परीक्षणको व्यवस्थाका लागि आग्रह गरेको थियो । स्वास्थ्य मन्त्रालयले स्वीकार गरेपछि सचिवालयमा भएका चिकित्सकहरुका अतिरिक्त समेत थप गरेर कोरोना परीक्षणको व्यवस्था मिलाइएको सचिवालयले जनाएको छ ।

लकडाउनका बीच शुक्रबारबाट सुरु हुन लागेको संसदको बजेट अधिवेशन स्वास्थ्य सुरक्षाका दृष्टिकोणले निकै जोखिमपूर्ण मानिएको छ। अधिवेशनका बेला मन्त्री, सांसद, कर्मचारी, सुरक्षाकर्मी, मन्त्री र सांसदका पीएसहित एक हजार जना भन्दा बढी संसद भवनमा भेला हुने भएकाले जोखिमपूर्ण रहने स्वास्थ्यविज्ञ बताउँछन्।

सुरक्षित तवरले अधिवेशन सञ्चालन गर्नेदेखि सांसदलाई सुरक्षित रुपमा ओसार पसार गर्ने थप जिम्मेवारी सचिवालयको काँधमा छ। सरकारको वार्षिक नीति तथा कार्यक्रम र बजेट भाषण गर्ने दिन संसदको दुवै सदनका ३ सय ३४ सांसदको संयुक्त बैठक बस्नुपर्छ। संयुक्त बैठकका दिन सामाजिक दुरी सहितको कुर्सी व्यवस्थापन गर्न सचिवालयलाई कठिन भएको छ। सचिवालयले साविकका दुई कुर्सीको बीचमा एक कुर्सी छोडेर सांसदलाई बस्ने व्यवस्था गरेको थियो। तर, स्वास्थ्य मन्त्रालय अन्र्तगत स्वास्थ्य सेवा विभागका विज्ञले एक मिटर सामाजिक दुरी हुनुपर्ने भन्दै बीचका दुई कुर्सी छोडनुपर्ने सुझाव दिएपछि सचिवालयले पुनः सोेही अनुसार व्यवस्थापन गरिरहेको छ।

राष्ट्रपतिबाट सरकारको वार्षिक नीति तथा कार्यक्रम सम्बोधनको दिन र बजेट भाषणका दिन दुवै सदनको संयुक्त बैठक बस्नुपर्छ। सचिवालयका सहप्रवक्ता दशरथ धमलाले स्वास्थ्य विज्ञको सुझाव अनुसार कुर्सी व्यवस्थापन गर्दा केही सांसदलाई (बाल्कोनी)मा राख्नुपर्ने अवस्था देखिएको बताए।

हालैमात्र दोस्रो मृगौला प्रत्यारोपण गरेका प्रधानमन्त्री केपी शर्मा ओलीको स्वास्थ्य सुरक्षामा विशेष ध्यान दिइएको सचिवालयका अधिकारीहरु बताउँछन्। प्रधानमन्त्रीका लागि बैठक कक्षको अघिल्लो लहर (रो) मा एकल कुर्सी राखिने र प्रधानमन्त्री भन्दा पछाडिको लहर (पुरै) खाली राखिने सचिवालयले जनाएको छ।

यसैगरी संसद सचिवालयले संसद भवन प्रवेश गर्ने बाटोमा साबुन पानीको व्यवस्था गर्दैछ। संसद भवन परिसरमा प्रवेश गर्ने जो कोहीलाई पनि हात धुन र मास्क लगाउन अनिवार्य गरिदैंछ। सचिवालयका अनुसार थर्मल गनमार्फत ज्वरो नाप्ने र हात धोइसकेपछि स्यानिटाईजरको व्यवस्था गरिएको छ। संसद बैठक कक्षमा पनि सांसद बस्ने कुर्सी अघि रहने बेञ्चमा स्यानिटाईजर राखिनेछ। माईक समाप्दा र माईक छोडेपनि हातमा स्यानिटाईजर गर्न सचिवालयले सांसदसँग आग्रह गरेको छ।

0 0 vote
Article Rating

LEAVE A COMMENT

guest
0 Comments
Inline Feedbacks
View all comments