नेपालमाला
१४ बैशाख २०७७, आईतवार 
घटना १ : गत चैत ३० गते कीर्तिपुर नगरपालिका वडा नम्बर १० का गणेशमान महर्जनको घरमा सयौं मानिस घेरा हाल्न पुगे । गणेशमानको घरमा डेरा गरी बस्ने बैकुण्ठ शर्मा र गर्भवती महिला देवी शर्मालाई डेराबाट निकालेर अन्यत्रै पठाउनका लागि दबाब दिन सयौं व्यक्ति त्यहाँ जम्मा भएका थिए ।
घटना २ : गत बुधबार कीर्तिपुरका विद्यार्थीलाई राहत वितरणका लागि सहजीकरण गर्दै आएका हेमराज थापामाथि कीर्तिपुर नगरपालिकामै सांघातिक आक्रमण भयो । कीर्तिपुर नगरपालिकाका जिम्मेवार व्यक्तिबाटै आफूमाथि दर्जनौं व्यक्तिले सांघातिक आक्रमण गरेको भन्दै हेमराजले सञ्चारमाध्यममा हारगुहार गरे । उनलाई मानव अधिकारीकर्मीको पहलमा उद्वार गरियो ।
घटना ३ : शनिबार दिउँसै कीर्तिपुरमा केही विद्यार्थीमाथि सडकमै हातपात भयो । कीर्तिपुरमै बसेर ‘कीर्तिपुरको बेइजत’ गरेको भन्दै ठूलो भीडले विद्यार्थीमाथि सांघातिक आक्रमण गरेको भिडियो विभिन्न सञ्चारमाध्यममा सार्वजनिक भयो ।
घटना ४ : शनिबार साँझ सयौं स्थानीय कीर्तिपुर प्रहरी बृत्त घेराउ गर्न पुगे । कीर्तिपुरको बेइजत गर्ने विद्यार्थीलाई नछाड्न भन्दै दबाब दिन ठूलो संख्यामा स्थानीयले प्रहरी बृत्त घेराउ गरेका थिए ।
यी केही प्रतिनिधि घटना मात्र हुन् । कीर्तिपुर क्षेत्रमा ‘लकडाउन’ उल्लंघनका थुप्रै घटना दिनदिनै भइरहँदा पनि सुरक्षा निकाय भने मौन बस्नुलाई रहस्यका रुपमा हेरिएको छ ।
कीर्तिपुर प्रहरी बृत्तका प्रमुख डीएसपी छेदीलाल कामती भने लकडाउन पालनामा सुरक्षा निकाय दिनरात लागिपरेको बताउँछन् । तर, त्यो खटाई अनुरुपको सुरक्षा अनुभूति भने यहाँका जनताले गर्न पाएका छैनन् । ‘लकडाउनलाई पूर्ण रुपमा पालना गर्न सुरक्षा निकाय दिनरात खटिरहेको छ’, प्रहरी प्रमुख कामतीले भने । उनले केही घटनामा स्थानीयले ध्यान नपु¥याउँदा समस्या देखिएको स्वीकारे ।
सिंगो नेपाल लकडाउन भएको आज ३३ दिन भइसकेको छ । गत चैत ११ गतेबाट सुरु भएको लकडाउन अझै लम्बिने देखिएको छ । तर, कीर्तिपुर भने संधैजस्तो खुला देखिएको छ । कीर्तिपुरको बजार क्षेत्रमा सुरक्षाकर्मीको बाक्लै उपस्थिति छ । त्यसका बाबजुद पनि त्यहाँ हरेक दिनजसो लकडाउन उल्लंघनका घटना भइरहेका छन् । त्यसलाई सुरक्षा निकायले नियन्त्रण गर्न सकेको देखिंदैन ।
प्रहरी प्रमुख कामती सीमित जनशक्तिका कारण सबै ठाउँमा सुरक्षाकर्मी परिचालन गर्न नसकिएको स्वीकार्छन् । ‘हामीकहाँ तोकिएको दरबन्दीभन्दा पनि निकै कम मात्रै जनशक्ति छ । त्यसले गर्दा केही निश्चित ठाउँमा पिकेड राख्न सकेका छौं’, उनी भन्छन्, कुन बेला कहाँ के हुन्छ भन्ने थाहा हुँदैन । खबर पाउनासाथ जाँदा पनि केही समय त लागिहाल्छ ।’
यसैगरी बजारभन्दा बाहिरको क्षेत्र भने संधै खुला नै देखिएको छ । यी क्षेत्रमा लकडाउनको खासै प्रभाव परेको देखिंदैन । यी क्षेत्रमा सुरक्षा निकाय पुग्न नसक्दा लकडाउन उल्लंघनका साथै विभिन्न आपराधिक गतिविधि पनि हुन थालेका छन् ।
प्रहरी प्रमुख कामती बजारभन्दा बाहिरका क्षेत्रमा पनि नियमित गस्ती गरिएको भन्न छुटाउँदैनन् । ‘हामीले सबै ठाउँमा नियमित गस्ती गरी सुरक्षा व्यवस्था चुस्त बनाउँदै आएका छौं’, प्रहरी प्रमुख कामती भन्छन् ।
उनले सरकारले घोषणा गरेको लकडाउन कार्यान्वयनमा प्रभावकारी रुपमा लाग्ने र दोषी देखिएकालाई कारवाही गर्ने प्रतिवद्धता पनि जनाए । तर, उनले प्रतिवद्धता जनाएजस्तो काम भने अहिलेसम्म पनि हुन सकेको छैन ।
हेमराज थापामाथि सांघातिक आक्रमण गर्नेलाई कारवाही गर्नुको सट्टा उनको कोठामा पुगेर छापा मारेको घटनाले नै कीर्तिपुरका सुरक्षा प्रमुखले कस्तो काम गरिरहेका छन् भनेर छर्लङ्ग पारिसकेको छ । आम जनताको सुरक्षामा खटिनुपर्ने सुरक्षा निकाय सत्ताको चंगुलमा कसरी चुलुम्म डुबेको छ, त्यो माथिका घटनामा देखाएको लाचारी र निरीहताले नै पुर्नपुष्टि गरेको छ ।
