ग्रीन भिलेजमा १० बेडको क्वारेन्टाइन

काठमाडौं : कीर्तिपुर नगरपालिका–४ को क्वारेन्टाइन भत्केपाटीमा अवस्थित ग्रीन भिलेज सेकेन्डरी स्कुलमा बनाइएको छ । कीर्तिपुर नगरपालिका वडा नम्बर ४ मा हालै बसेको बैठकले उक्त विद्यालयमा क्वारेन्टाइन बनाउने निर्णय गरेको हो ।

वडा नम्बर ४ का अध्यक्ष राजेन्द्र बानियाँको विशेष पहल र सक्रियतामा ग्रीन भिलेजमा क्वारेन्टाइन बनाइएको हो । हालका लागि विद्यालयमा १० बेडको क्वारेन्टाइन बनाइएको छ । क्वारेन्टाइनमा पकाउने, खाने, सुत्ने सबैको व्यवस्था भइसकेको अध्यक्षले बानियाँले जानकारी दिए । उनले क्वारेन्टाइनको सुरक्षाका लागि प्रहरी र मेडिकल सर्पोटका लागि कीर्तिपुर नगरपालिकासँग अनुरोध गरिएको बताए ।


वडा अध्यक्ष बानियाँले विपद्को घडीमा आफ्नो स्कुल प्रयोग गर्न अनुमति दिनुुहुने विद्यालय परिवारलाई धन्यवाद पनि दिए । ‘विपद्को अवस्थामा क्वारेन्टाइन निर्माणका लागि आफ्नो विद्यालय उपलब्ध गराउनु हुने विद्यालय परिवारलाई धन्यवाद दिन चाहन्छु’, उनले भने, ‘हामी सबैको एकता र सहकार्य भयो भने नै महामारीको रुपमा फैलिएको कोरोनाबाट बच्न सक्छौं ।’

उनले अहिलेसम्म वडा नम्बर ४ मा कोही पनि संक्रमित नभेटिएको जानकारी दिए । ‘अहिलेसम्म यस वडामा कोरोना भाइरसको संक्रमित भेटिएको छैन, वडा अध्यक्ष बानियाँले भने, ‘विदेशबाट आएकाहरुलाई होम क्वारेन्टाइनमा राखेका छौं भने अरुको नियमित अनुगमन भइरहेको छ ।’

‘लकडाउन’ लम्बिन सक्ने भएकाले दैनिक मजदुरी गरेर जीविकोपार्जन गर्दै आएका निम्न वर्गका वडाबासीलाई अत्यावश्यक खाद्य सामग्री, औषधिलगायतका सामग्री उपलब्ध गराउने अभियानमा पनि सुरु गरेको उनले बताए । ‘कोरोना भाइरसबाट संक्रमित हुनेको संख्या दिनदिनै बढिरहेको छ । यस्तो अवस्थामा लकडाउन लम्बिन सक्छ । लकडाउन लम्बियो भने दैनिक मजदुरी गरेर जीविकोपार्जन गर्दै आएकाहरु भोकभोकै नपरुन भनेर अत्यावश्यकीय सामग्री वितरण गर्ने योजना बनाएका छौं’, उनले भने, ‘अहिले सबैतिरबाट त्यस्ता परिवारको तथ्यांक संकलन भइरहेको छ ।’

0 0 vote
Article Rating

LEAVE A COMMENT

guest
0 Comments
Inline Feedbacks
View all comments