हवाई क्षेत्रमा कोरोना प्रभाव

काठमाडौं : पर्यटक आवागमनमा कमी आएसँगै मुलुकको आन्तरिक तथा बाह्य हवाई उडान प्रभावित बन्न पुगेको छ । आगामी वैशाखसम्म सबै अनअराइभल भिसामा कटौती गरेसँगै हवाई क्षेत्रमा यात्रुको चापमा करिब ५० प्रतिशतले नै कमी आएको वायुसेवा सञ्चालकले बताएका छन् ।
पछिल्लो आंकलनअनुसार आन्तरिक उडानमा करिब ८ अर्ब रुपैयाँ घाटा व्यहोर्ने नेपाल वायुसेवा सञ्चालक संघको अनुमान छ । एकहप्ता अघि मात्रै संघले ४ अर्बको नोक्सानी हुने आंकलन गरेकोमा अहिले ९० प्रतिशतसम्म उडान कटौती हुने प्रक्षेपण गरेको हो । १० प्रतिशत आन्तरिक चहलपहलका कारण उडान हुने अपेक्षा गरिएको छ ।
अहिले ५० प्रतिशतभन्दा कमले यात्रु कटौती भएको छ । २७ वटा हेलिकप्टरमध्ये शुक्रबार ३ वटाले मात्र ३ घण्टा उडान भरेका छन् । जबकी यो समयमा ९० घण्टा हेलिकप्टरले उडान भर्दै आएका थिए ।
नेपालको प्रमुख पर्यटकीय सिजन वसन्त ऋतुमा पोखरा, जोमसोम र लुक्लामा उडान भर्न भ्याइनभ्याइ हुनुपर्नेमा लुक्लामा १२ उडानमा ४ वटा मात्रै भएको छ भने शुक्रबार पोखरामा १३ वटा उडान भएका छन् । प्रमुख पर्यटकीय गन्तव्यको रूपमा रहेका यी स्थानमा जाने यात्रुको संख्यामा निकै नै कमी आएको छ ।
त्रिभुवन विमानस्थलमा दैनिक ६० देखि ६५ अन्तर्राष्ट्रिय उडान हुने गरेकोमा घटेर हाल ३० देखि ३५ मात्रै अन्तर्राष्ट्रिय उडान हुन थालेका छन् । मार्च महिनाको अहिलेसम्म हवाई मार्गबाट ६४ हजार १६४ जना नेपाल भित्रिएका छन् जसमा नेपालीको नै बर्चस्व देखिएको छ । कोरोना असर अघि नेपाल आउने यात्रुमा ४४ प्रतिशत विदेशी र ६६ प्रतिशत नेपाली हुने गरेकोमा पछिल्लो अनुपात अनुसार ७५ प्रतिशतभन्दा बढी नेपाली नै छन् ।
वायुसेवा सञ्चालकलाई केही राहत दिन अन्तर्राष्ट्रिय इन्धनको मूल्यमा गिरावट आइरहेकाले हवाई इन्धनको मूल्यमा समायोजन गर्न माग गरिएको छ । वायुसेवा सञ्चालनको सबै खर्चमध्ये ४० प्रतिशत खर्च हवाई इन्धनमा हुने गरेको छ ।