नेपालमाला
४ फाल्गुन २०७६, आईतवार काठमाडौं : सरकारले चीनको हुपै प्रान्तमा रहेका नेपालीको उद्वार गरेको छ । पछिल्लो समय संसारभर आतंक फैलाएको कोरोना भाइरसको उद्गमस्थल हुपैको वुहानसहित ६ सहरमा रहेका १७५ नेपाली नेपाल आइपुगेका छन् । नेपाल वायुसेवा निगमको चार्टर्ड विमानबाट उनीहरुलाई आइतबार बिहान काठमाडौं ल्याइएको हो ।
यसअघि १८५ नेपालीले स्वदेश फर्कन बेइजिङस्थित नेपाली दूतावासमा आवेदन दिएका थिए । तीमध्ये शरीरमा तापक्रम उच्च देखिएपछि ६ जनालाई उतै राखिएको छ । उनीहरूको रगत परीक्षणको रिपोर्ट आएपछि उपचार प्रक्रिया अघि बढाइने भएको छ । आवेदन दिएका चारजना भने नेपाल नफर्कने भन्दै उतै बसेका छन् ।
