नेपालमाला
१० पुष २०७६, बिहीबार 
काठमाडौ : राष्ट्रिय प्रजातन्त्र पार्टीका अध्यक्ष कमल थापाले मुलुकको राष्ट्रिय राजनीतिमा पार्टीलाई वैकल्पिक राष्ट्रवादी प्रजातान्त्रिक शक्तिका रूपमा स्थापित गराइने बताउनुभएको छ । हेटौँडामा पार्टी जिल्ला समितिद्वारा आज आयोजित विस्तारित बैठकमा अध्यक्ष थापाले धर्म, संस्कृति र गौरवशाली पहिचानको रक्षा, संरक्षण र सम्बद्र्ध्नका साथ मुलुकलाई सबल र समृद्धिको मार्गमा डो्याउँदै अघि बढ्ने मार्गचित्र प्रस्तुत गर्नुभयो । आफ्नो धर्म, संस्कृति र पहिचानका पक्षमा बोल्दा कुनै हीनताबोध राख्नु आवश्यक छैन भन्दै अध्यक्ष थापाले उच्च मनोबलका साथ पार्टीको फरक र मौलिक विचार जनतासमक्ष लैजान कार्यकर्तालाई आग्रह गर्नुभयो ।
एनसेल, बालुवाटार जग्गा, वाइडबडी, गोकर्ण रिसोर्ट, सुन काण्ड जस्ता भ्रष्टाचार काण्डको जवाफ जनताले एक दिन खोज्ने अध्यक्ष थापाको भनाइ थियो । जिल्ला अध्यक्ष मधु अधिकारीको अध्यक्षतामा बसेको बैठकमा सहमहामन्त्री दीपक सिंह, केन्द्रीय सदस्य, जिल्ला, क्षेत्र र नगरका पदाधिकारी तथा जनवर्गीय सङ्गठनका प्रमुखहरुले आआफ्नो धारणा राख्नुभएको थियो ।
