नेपालमाला
२८ पुष २०७८, बुधबार 
काठमाडौं : नेपाल तेक्वान्दो संघ गण्डकी प्रदेशको अध्यक्षमा जगन गुरुङ निर्वाचित भएका छन् । संघको पोखरामा हालै सम्पन्न प्रथम अधिवेशनबाट गुरुङ अध्यक्षमा सर्वसम्मत निर्वाचित भएका हुन् ।
यसैगरी २७ सदस्यीय कार्यसमितिमा १४ जना सर्वसम्मत भएका छन् । बाँकी पदाधिकारी पछि थप गरिने नवनिर्वाचित अध्यक्ष गुरुङले जानकारी दिए।
सर्वसम्मत निर्वाचित भएका अन्य पदाधिकारीमा उपाध्यक्षमा विष्णुहरि गौतम र कमल पराजुली, महासचिवमा रमेश पौडेल, सचिवमा गंगाबहादुर गुरुङ र कोषाध्यक्षमा माइकल कर्माचार्य छन् । प्रथम अधिवेशनले कार्यसमिति सदस्यमा कुलबहादुर तामाङ, विकल्प बोगटी, राजु थापा, योगराज अधिकारी, लक्ष्मी पाण्डे, शिवराज वाग्ले, नरेश भट्टराई र सर्फुदिल मिया छन् ।
यसअघि संघको प्रथम अधिवेशनको उद्घाटन गण्डकी प्रदेश प्रमुख पृथ्वीमान गुरुङले गरेका थिए । उनले सरकारले खेलकुदलाई हेर्ने दृष्टिकोणमा परिवर्तन गर्नुपर्ने खाँचो औल्याएका थिए । खेलकुदबाट नै आर्थिक उन्नती सम्भव छ भन्ने कुरा अन्तर्राष्ट्रिय जगतमा प्रमाणित भएका तथ्यहरु उजागर गर्दै प्रदेश प्रमुख गुरुङले स्पोर्टसम्यानशिप देखाउन सक्यौ भने पनि आर्थिक रुपमा सम्पन्नता हुन सकिने धारणा राखेका थिए ।
नेपाल तेक्वान्दो संघका महासचिव दीपराज गुरुङले संघले पोखरामा माउन्ट एभेरेष्ट अन्तर्राष्ट्रिय तेक्वान्दो प्रतियोगिता आयोजना गर्ने बताए । उनले संघले सैलुङमा हाईअल्टिच्युड सेन्टर र लुम्बिनीमा अन्तर्राष्ट्रिय तेक्वान्दो मेडिटेसन सेन्टर निर्माण गर्ने योजना रहेको बताउँदै अन्तर्राष्ट्रिय तेक्वान्दो मेडिटेसन सेन्टर निर्माण गर्न जग्गा प्राप्ती समेत भइसकेको बताए ।
प्रदेश खेलकुद परिषद् गण्डकीका सदस्यसचिव तेज गुरुङले खेलकुद विकासका लागि सरकारको बजेट प्रर्याप्त नभएको बताए । उनले खेलकुद शिक्षा स्वास्थ्यसँगै राष्ट्रिय तथा अन्तर्राष्ट्रिय सम्बन्धको विकास, शान्ति, आर्थिक, वातावरण एवं सामाजिक क्षेत्रसँग समेत जोडिएको बताउँदै खेलकुदले सामाजिक विभेदलाई समेत अन्त्य गरेको दाबी गरे ।
नेपाल तेक्वान्दो संघ गण्डकीका अध्यक्ष जगनबहादुर गुरुङको अध्यक्षतामा भएको उद्घाटन कार्यक्रममा नेपाल तेक्वान्दो संघका केन्द्रीय अध्यक्ष प्रकाशशम्शेर राणा, पोखरा पर्यटन परिषद्का अध्यक्ष गोपी भट्टराईलगायतले आफ्नो धारणा राखेका थिए । कार्यक्रममा नवनिर्वाचित केन्द्रीय अध्यक्षसहित पदाधिकारीलाई सम्मान पनि गरिएको थियो ।
