विश्वकप टोली घोषणा

काठमाडौं : अमेरिका र वेस्ट इनिडजमा आगामी जुन २ देखि सुरु हुने आईसीसी टीट्वेन्टी विश्वकप क्रिकेटका लागि नेपाली टोली घोषणा गरिएको छ । नेपाल क्रिकेट संघ (क्यान) ले बुधबार नेपाली टोली घोषणा गरेको हो ।
क्यानले रोहितकुमार पौडेलको कप्तानीमा १५ सदस्यीय टोली घोषणा गरेको छ । टोलीमा तीव्र गतिका बलर कमलसिंह ऐरी र स्पिनर सागर ढकाललाई समेटिएको छ । यस्तै आसिफ शेख, अनिल साह, कुशल भुर्तेल, कुशल मल्ल, दीपेन्द्रसिंह ऐरी, ललितनारायण राजवंशी, करण केसी, गुलसन झा, सोमपाल कामी, प्रतिश जिसी, सन्दीप जोरा र अविनाश बोहरा छन् ।
क्यानले यसै महिना एसीसी प्रिमियर कपमा सहभागी टोलीमा दुई परिवर्तन गरेको हो । विवेक यादव र आकाश चन्दको स्थानमा कमल र सागरलाई समावेश गरिएको हो । वेस्ट इन्डिज ‘ए’सँगको टीट्वेन्टी शृंखलामा समेटिएका विवेक र अकाशसहित विनोद भण्डारी, आरिफ शेख र लोकेश बमले पनि टोलीमा स्थान बनाउन सकेनन् ।
टीट्वेन्टी विश्वकपमा नेपाल नेदरल्यान्ड्स, दक्षिण अफ्रिका, श्रीलंका र बंगलादेशसँगै समूह ‘डी’मा छ । नेपालले जुन ४ मा नेदरल्यान्ड्ससँग खेल्दै प्रतियोगिताको सुरुवात गर्नेछ । त्यसपछि जुन १२ मा श्रीलंका, जुन १५ मा दक्षिण अफ्रिका र जुन १७ मा बंगलादेशसँग खेल्नेछ ।