नेपालमाला
२१ जेष्ठ २०७९, आईतवार 
काठमाडौं : नेकपा एकीकृत समाजवादी पार्टीले पार्टीको तर्फबाट सरकारमा सहभागी मन्त्रीलाई फिर्ता बोलाउने निर्णय गरेको छ। सो पार्टीको सचिवालय बैठकले हाल पार्टीको तर्फबाट सरकारमा सहभागी मन्त्रीहरुलाई फिर्ता बोलाएर नयाँ पठाउने निर्णय गरेको हो।
समाजवादीबाट हाल ४ मन्त्री र एक राज्यमन्त्री रहेका छन् । राज्यमन्त्री भूमिकामा रहेकी भवानी खापुङबाहेक सबैलाई फिर्ता बोलाउने निर्णय भएको सो पार्टीका सम्मानित नेता झलनाथ खनालले जानकारी दिए ।
खनालले भने, ‘पार्टीबाट गएका मन्त्रीहरुको कार्यक्षमता भएन, राम्रो नतिजा पनि आएन । सचिवालय बैठकले २४ घण्टाभित्रै मन्त्री फिर्ता बोलाउने निर्णय गरेको छ । अब भोलि नै पार्टीबाट सरकारमा नयाँ व्यक्ति पठाउँछौं ।’
आइतबार पार्टी कार्यालय तीनकुनेमा बसेको समाजवादीको सचिवालय बैठकमा सरकारमा पार्टीबाट मन्त्रीहरुको हेरफेरका बारेमा छलफल भएको र यसको अधिकार पार्टी अध्यक्ष माधव कुमार नेपाललाई रहेको उपमहासचिव गंगालाल तुलाधारले जानकारी दिए।
उनले ६ महिनाका लागि सरकारमा पठाएकाले मन्त्री हेरफेर गर्ने बिषयमा छलफल भएको बताए। पार्टीबाट मन्त्री भएकाहरु र शीर्ष नेताहरुबीच छलफल हुने र आवश्यक निष्कर्षमा पुगिने उनको भनाइ छ। उपमहासचिव तुलाधरले मन्त्री फेरबदल गर्ने निर्णय सबैले मान्नुपर्नेसमेत बताए। त्यस्तै उनले बाम एकता राम्रै कुरा भएको भए पनि इमान्दारी नभए राम्रो नहुने पुष्टि भइसकेको जिकिर गरे।
तुलाधरले गठबन्धन भत्काएर मुलुकलाई बबार्दीतर्फ लान नहुने बताए। सचिवालय बैठकले पार्टीका सबै कमिटीहरुलाई प्राकृतिक विपतको पूर्वतयारीका लागि परिचालन गर्ने निर्णय गरेको उनले बताए। समाजवादीले छिटै केन्द्रीय कमिटी बैठक बस्ने र त्यसपछि केन्द्रीय परिषद्को बैठक बोलाउने तयारी भइरहेको जनाएको छ।
