नेपालमाला
१७ बैशाख २०७८, शुक्रबार 
काठमाडौं : नेपाल सुपर लिग (एनएसएल) फुटबलमा काठमाडौं रेजर्स र पोखरा थन्डर्सले बराबरी खेल्दै अंक बाडेका छन् । त्रिपुरेश्वरस्थित दशरथ रंगशालामा शुक्रबार भएको खेलमा काठमाडौं र पोखराले गोलरहित बराबरी खेलेका हुन् ।
दुवै टोलीले पाएको अवसरलाई सदुपयोग गर्न नसक्दा अंक बाँड्न बाध्य बनेका हुन् । काउन्टर अट्याकलाई रणनीति बनाएको काठमाडौंले दोस्रो हाफमा पाएका थुप्रै अवसरलाई सदुपयोग गर्न सकेन । खेलको तेस्रो मिनेटमा काठमाडौंका स्टेफन बियोङले डिबक्सको बाहिरबाट प्रहार गरेको बलले पोस्टको दिशा लिन सकेन । छैटौं मिनेटमा पोखराका मौसा अब्बाको प्रहार काठमाडौंका गोलरक्षक विकेश कुथुले विफल बनाएका थिए । २३औं मिनेटमा पोखराले गोल गर्ने राम्रो अवसर गुमाएको थियो । काठमाडौंका गोलरक्षक विकेश कुथुले मिस पास गर्दा नवयुग श्रेष्ठले सदुपयोग गर्न सकेनन् । त्यसलगत्तै आयुष घलानको हेड बलले पनि पोस्टको दिशा लिन सकेन ।
दोस्रो हाफको ५५औं मिनेटमा आयुष घलानको प्रहार बाहिरिएको थियो । ७१औं मिनेटमा काठमाडौंका मेसौके ओलुमोउको प्रहार पनि बाहिरिएको थियो । खेलको ८०औं मिनेटमा काठमाडौंका मेसौकेले गोलको अर्को अवसर खेर फालेका थिए । पोखराका गोलरक्षक दीप कार्की बिट भइसकेको अवस्थामा उनको प्रहार पोस्ट नजिकैबाट बाहिरिएको थियो । ८९औं मिनेटमा पेनाल्टी क्षेत्रबाट मेसौकेको प्रहार पोखराका डिफेन्डरले क्लियर गरेका थिए । खेलको इन्जुरी समयमा पोखराका प्रवीण स्याङतानको हेड गोलले मान्यता पाएन । उनको गोललाई रेफ्रीले अफसाइट दिएका थिए ।
यस बराबरीसँगै पोखराले तीन खेलमा चार अंक जोडेको छ । काठमाडौंले पनि तीन खेलबाटै चार अंक बनाएको छ ।
शुक्रबार भएको खेलको इमर्जिङ प्लेयर अफ दी म्याच काठमाडौंका राजन गुरुङ बने । उनले १० हजार नगद पुरस्कार प्राप्त गरे । यस्तै प्लेयर अफ दी म्याच पोखरा थन्डर्सका पद्म मोक्तान घोषित भए । उनले नगद २५ हजार पुरस्कार पाए ।
सात टोली सहभागी प्रतियोगिताका शीर्ष चार टोलीले प्लेअफमा स्थान बनाउने छन् । पहिलो र दोस्रो हुने टोलीले क्वालिफायर खेल्ने छन् । तेस्रो र चौथो स्थानमा रहने टोलीले इलिमिनेटर खेल्ने छन् । जेठ १ गतेसम्म सञ्चालन हुने प्रतियोगिताका विजेताले ३५ लाख रुपैयाँ पुरस्कार पाउने छ । यस्तै उपविजेताले १५ लाख रुपैयाँ प्राप्त गर्नेछ । प्रतियोगिताको विधागततर्फका उत्कृष्टले जनही एक लाख रुपैयाँ पाउने छन् ।
