नेपालमाला
४ चैत्र २०७७, बिहीबार 
काठमाडौं : नेपाली राष्ट्रिय पारा खेलाडीलाई खेल सामग्री सहयोग गरिएको छ । नेपाली राष्ट्रिय पारा तेक्वान्दो टोलीका पूर्वप्रशिक्षक कल्याण कुँवरले तेक्वान्दो खेलाडीलाई खेल सामग्री प्रदान गरेका हुन् ।
सातदोबाटोस्थित नेपाल तेक्वान्दो एकेडेमीमा बिहीबार आयोजना गरिएको एक कार्यक्रममा तीन जना पारा खेलाडीलाई खेल सामग्री प्रदान गरिएको हो ।
पारा अनिशा वाइबा र विशाल गर्बुजा तथा राष्ट्रिय जुनियर खेलाडी सृष्टि सुन्दासलाई दोबक, सिन गार्ड र ह्यान्ड गार्ड प्रदान गरिएको थियो । तेक्वान्दोका पूर्व राष्ट्रिय खेलाडी रन्जन श्रेष्ठले खेलाडीहरुलाई कुँवरले उपलब्ध गराएको खेल सामग्री हस्तान्तरण गरेका थिए ।
विशाल आगामी जेठ २ गते जोर्डनमा आयोजना हुन लागेको पारा ओलम्पिकको छनोट खेल र वैशाख ७ मा लेबनानमा हुने छैटौं एसियन पारा ओपन च्याम्पियनसिपका लागि तयारी गरिरहेका छन् ।
विशाल के–४४ विधाअन्तर्गत ६१ केजी तौलसमूह र अनिशा के–४२ विधाका खेलाडी हुन् । हाल क्यानाडामा रहेका कुँवर त्यहाँको मिसासागा तेक्वान्दो एकेडेमीमा प्रशिक्षण गराइरहेका छन् । सो अवसरमा पारा तेक्वान्दोका प्रशिक्षक कविराज नेगी लामाले खेलाडीलाई प्रोत्साहनका लागि खेल सामग्री प्रदान गरेकोमा कुँवरलाई धन्यवाद दिएका थिए ।
